اُنﷺ کی چوکھٹ پہ رَکھ کر جَبیں دیکھنا
دو جَہاں ہوں گے زیرِ نَگیں دیکھنا
جِن کی ہر اِک اَدا میں ہیں آقاﷺ بسے
وہ بھی جَنّت کے ہوں گے مکیں دیکھنا
میرے آقاﷺ کی مِدحَت کرو تو سَہی
ہم نوا ہوں گے روح الاَمیںؐ دیکھنا
یہ وَتیرہ تھا کُہسار و اَشجار کا
سَر جُھکانا جو اُنﷺ کو کہیں دیکھنا
روزِمحشر قیامت کے ہنگام میں
پاؤں پڑتے ہوۓ نکتہ چِیں دیکھنا
نَعت ، شاہِ مدینہﷺ کی کہتے رہو!
اَجر مِل جائےگا تم یَہیں دیکھنا
عاشقِ مصطفےٰﷺ میرے حبشی بِلالؓ
سَاری دنیا سے ہوں گےحسیں دیکھنا
ہو نَظارہ مدینے کا فِردوس سے
اِس سے بڑھ کے مجھےکچھ نہیں دیکھنا
روزِ مَحشر محمدﷺکے مِدحَت سَرا
لازماً ہوں گے مَسند نَشیں دیکھنا
نورِ اَحمدﷺ سے نِسبَت ہے جِس خاک کو
کاش ممکن ہو وہ ہی زَمیں دیکھنا
کاش دورِ پیمبرﷺ میں لیتا جنم
ہوتا قسمت میں نورِ مبیںﷺ دیکھنا
جِس جگہ آپﷺ کا نَقشِ نَعلین ہو
میری خواہش ہے دانِش وہیں دیکھنا
